借錢還完卡數又可以再買過

昨天，蛋屋好驚驚好辛苦咁演完佢哋人生第一場戲。
蛋紮住個花旦頭紮到無晒表情，頭好痛。
屋話有少少驚，不過佢忍住。
演完後，女麻女麻奬咗利是仔俾佢哋，每人$100大元。蛋姐係十足港女，最鐘意禮物，於是嚷著要用自己錢買禮物。
去到一間平民化精品店，M已提醒佢身上只有$100蚊，只可買$100或以下的禮物。
屋妹買咗公主文具套裝，盛惠$28。
蛋姐想買懶懶熊，因為似足自己咁懶。但毛公仔要$148，我哋兩個好似賊咁細細聲討論點算。
蛋姐想問我借錢買，但我就同佢講，咁同電視入面借錢買嘢啲姐姐有乜分別。佢都明白，於是問B點算。B反問佢想點，佢又話想問B借錢（即係無反省）。B居然慈父多敗兒真係想借俾佢。我即係黑面制止：

B：我先幫佢出，佢返屋企用錢罌啲錢還返俾我。
M：佢錢罌無咁多錢。

B開始好不滿，點解$48都要同蛋姐計較，佢咁乖咁辛苦演完一場戲，點解唔可以奬勵佢，佢只係想要一個百零蚊的毛公仔，點解唔可以買俾佢......以上都係B心想而已，不敢當面同M講，但佢眼神已講晒以上所有嘢。我就同B講，要蛋黃知道自己有$100蚊，就只可以買$100蚊嘢，唔係第日就好似某某財務公司啲廣告一樣，借錢還完卡數再shopping。

然後，我哋幫蛋黃揀咗兩隻縮水的懶懶熊，一隻$55蚊，兩隻剛剛$100大元。我問佢想買一隻留返$45聽日再買貼紙，定係用晒$100蚊買兩隻。佢選擇要兩隻，咁就俾佢買，佢好開心。

父母家訓：先駛未來錢，吃虧在眼前。

今天上演了一齣好戲

背景：Ｂ昨天出發到省城開會去，一連3日。昨晚是一屋女人的第一夜。

場景一：Ｍ下班回家吃過晚飯已經七點差十分。
Ｍ：蛋，練琴了沒有。
蛋：我在執書包喎。
Ｍ：咁屋妹練琴啦。

 (屋妹好乖咁去練習。蛋黃執完書包......)
Ｍ：蛋，沖涼先。
蛋：咁我係唔係等屋妹沖涼時我至練琴。
Ｍ：係呀，你去攞衫然後排洗啦。

場景二：套房入面

(蛋快心快腳咁入廁所。蛋黃準備沖涼之際，屋妹手持一本故事書入房......)

Ｍ：又做乜唔練琴呀
(屋妹可憐兮兮的樣子)
Ｍ：係咪想响房入面睇書呀
屋：係

(Ｍ幫蛋沖完涼，穿好上衣......)

蛋：媽咪，今晚好涼，我想浸腳（即足浴也）
Ｍ：唔好，爸爸唔响處，等爸爸返嚟先。(大喊) 屋妹沖涼

(蛋黃自己抹乾對腳，著好底衭仔，搽好cream同面cream，著長衭，著外套，梳頭，出土練琴)
(屋沖完涼，Ｍ重覆幫蛋做的事情。屋妹自己理自己之際，Ｍ沖涼）

場景三：床上

(Ｍ幫屋妹吹頭）
蛋：媽咪，我想聽呢個故仔。(屋妹的故事書)
Ｍ：好呀，你先整好枕頭被舖。
(Ｍ幫蛋黃吹頭）
屋：媽咪，我想聽故仔。(又係嗰本書)
Ｍ：好呀，你先整好枕頭被舖。

(大家在床上準備就緒)

蛋：媽咪，我想聽第二個故仔。(門神故仔)
屋：我想聽第一個喎。(年獸阿儺)
蛋：呢本書你睇過咁多次，佢我揀先啦。
屋：(大哭)唔制，我要聽第一個呀....鳴鳴鳴
蛋：好啦，好啦，講第一個啦
Ｍ：家姐今次就咗你，你要點講呀？
屋：多謝家姐。

(大家快樂地聽故仔，聽完故仔睡大頭覺去）