小趣一則

話說，蛋姐小小事，都會喊到拆天。
B愛惜蛋兒，有時真係忍唔住，人都顛。

有一次，又是為了一些小事大喊，屋妹剛巧在旁邊。佢都忍唔住，打了家枝一吓。

B忍唔住說了：THANK YOU
屋妹竟答：WELCOME

甜姐兒

屋妹的咀巴真係好甜!

星期一晚, 兩隻寶食晒自己啲餸得白飯。M見佢哋咁可憐, 將M&B的中午便當菜--獅子狗炒菇菇分一點給她們吃。(因為近日買了一本《週末搞定一週便當菜》, 所以煮了很多)

屋手舞足蹈, 吃了一口: 媽咪, 好好食呀。
真乖!

昨晚, 已忘了什麼原因, 蛋又在發飊嚎哭。B正在教瞓蛋中, 屋走過打了蛋一下, 然後走開。
B: thank you.
屋: welcome.

今早, 保姆L幫屋在廁所排洗期間, M差不多要出發返工, 到廁所跟屋say goodbye。
屋: 媽咪, 好靚呀(看著M的衣服)。
咀仔真係甜死人。M要小心糖尿病了。

(續) 嗚嗚......我好掛住爸爸

前晚, 本來B見蛋咳得咁利害, 就破格陪蛋瞓。點知瞓到半夜, 唔知係唔係發惡夢, 蛋黃發顛, 腳仔係咁踢。B終於頂唔住返自己房瞓。

瞓到半夜, 蛋黃醒咗, 見唔到B就喊喊。
M當然安慰蛋, 叫佢勇敢啲, 自己瞓(其實M跟屋妹在同一間房的另一張床而已)。

蛋話好驚, M就話: 頭先你發惡夢, 腳仔踢踢, B被你踢暈咗喎。
蛋依然喊喊, 話掛住B, M就溫柔輕聲地話: 你唔好再喊喇, 嘈醒屋妹你就知死呀。

突然, 屋妹彈起身, M拍拍屋再瞓過。
M:(繼續溫柔地)你已經嘈醒咗屋妹喇, 好同我收聲, 要喊合埋把口喊。

如是者, 蛋只好飲泣, 喊濕了幾個枕頭。然後, 又突然彈起身同M講: 我好掛住爸爸呀。
M見蛋咁可憐, 又咳咳, 於是同蛋講: 我去睇吓B醒咗未啦, 如果B醒咗, 我叫佢陪你吖, 不過如果B仲係被你踢暈未醒, 咁就無辦法要自己瞓喎。

蛋當然乜都聽唔入耳, 只係聽到M會叫B陪自己瞓, 好開心, 收聲。
M: 疴唔疴0殊0殊呀?
蛋(搖頭)
M: 喊咗咁耐, 賴濕張床你就知死喎
良久, 蛋點頭要0殊0殊。
完成, M準備幫蛋上床瞓過。
蛋: 我哋去搵爸爸lor
於是,M拖住蛋去搵爸爸, 然後一隻樹熊黏在B身上。

當蛋睡在B的床上, 雖然面有淚痕, 但咀角微微向上。
M:0依, 點解你笑笑0既?
被M篤爆, 蛋忍唔住笑咗出0黎, 好鬼開心。
蛋: 媽咪, 點解你得番個咀巴0既?
M:????????

M起初ao晒頭唔明白。原來, 之前蛋黃發惡夢, 夢見M變咗怪獸無咗眼同鼻, 得番個咀, 所以好驚, 腳仔踢踢。

嗚嗚......我好掛住爸爸

話說，為咗要幫蛋升呢，成為一個立小可愛，進行狠心大特訓（對Ｂ而言）．．．．．．．自己一個人睡。

真係好可憐，自己一個人。

有時被逼一個人睡，只可獨自飲泣。真係好可憐，又俾Ｍ鬧，唔好嘈醒屋妹。真係．．．．

這是上星期，M送蛋返校途中。這天蛋黃笑得好甜好開心,引發起以下對話:
M：點解咁開心
蛋：B噚晚同我一齊瞓
M：咦, 奇怪喇, 噚晚又無行雷, 點解B同你瞓0既?
（因為前幾晚，因為行雷，M特准B可同蛋黃睡)

蛋笑笑口, 甜絲絲咁話: 我驚吖嘛
M：噚晚明明係你自己瞓故喎。我知喇, 可能係蛋黃驚驚, B感覺到, 然後馬上過嚟陪蛋黃瞓

如是者，蛋黃聽到後，笑笑得好鬼甜。
以下是M的形容：甜過蜂蜜糖漿

妹妹打我，家枝打我

孩子長得太快，成熟了很多。
以前下班兩只寶會馬上走過來，攬著你不同的部份，首先係腳，如果你蹲下來，馬上跳上你大脾，熊抱你修腰，幻成樹熊小天使。跟著你，貼住你唔走開。

家陣，唓！唓！
門鎖剛開．．．．
蛋：妹妹，打我個頭，我冇打佢，好痛。

初時的屋妹，會默不作聲，馬上走過來攬著你。隨著時光飛逝，人也開始成熟了，知道什麼叫反擊，不再是以前沉默的羔羊。即使做錯，唔緊要，最重要是什麼．．．

轉移視線。
屋：家枝（姐）打我，
M or B：咁痛唔痛，
就係咁兩個開始你一言，我一語。總是叫個不停。真的是沒完沒了。

蛋有時會加多一句：我好乖，冇打妹妹。
（但是，乖不是不打人，而是不要將不打人的作為乖乖系列中的特別專輯）
（打人是不正確，不正態的行為）
聽到這句話只有ｏ咀加無語。
乖的是，教導妹妹不要打人。不是縱容屋妹打你，因為你是一個不還手的不倒翁公仔，打極都唔會還手，而是最先進的型號，有音量調節，公仔會發聲的．．．．

Family Tree 解說

謝謝老師（圖例說明）

咸屋

真係好彩,好彩M&B生到兩個可人兒。
真係好彩,倆個都係女仔。
真係好彩,咁樣啲衫就唔怕冇人執手尾,有效的愛自然,愛地球。
真係好彩,蛋黃好精靈。
真係好彩,好似屋妹比蛋黃更精靈。
真係好彩,屋妹係女仔。

唔好彩的是屋妹好鬼咸濕。
如果佢係男生,真係分分鐘M&B去差館,會多過去見家長。

屋妹這種人是逢"朱"必愛!
由M的,到保姆L,直至最近B的"朱"。佢每日的期待便是M回來時,熱烈地歡迎...

她的"朱"

嘩!她的月亮彎刀咸濕眼,真係令你五體投地。
最近M為響應瞓覺應著睡衣的宣傳活動, 穿了睡裙。屋妹見到M的吊帶睡裙,眼睛、口水差不多全部跌晒出來。即刻撲過M處,變成M&M。

不知何時屋妹可以戒了這個壞習慣。最好越快越好,否則當她長大後,出街時仲未收歛,突然成隻手伸入人哋件衫時,真係不堪入目兼設想。

罪過。

屋妹嘻嘻哈哈

平面圖，還是family tree

大伯父，大伯娘送了一塊白板後，她們倆極喜歡在白板上畫畫。

屋妹最愛在板上不停的打圈，蛋黃則愛畫人，畫公主。最近便畫這張家居平面圖：

謝謝，老師

老師因要照顧孩子，未能身兼兩職。

要走了，蛋黃畫了一張咭送給老師，以表心意。



在此M&B，也感謝老師對蛋黃的悉心照顧。

天氣好，去郊遊

昨天天氣好，不如去郊遊，上山了。特別係屋妹，常常困家中，有街去，有如久旱逢甘露，歡喜若狂。上山去，真近便，一家大小，行了二十多分鐘，便去了一個有如私人的大草地。（因時間尚早，山友們仲未出現，可惜時間一到，一批又一批山友殺到，高談闊論，非常熱鬧，為免打擾人家雅興，見狀後，亦收拾收拾打道回府）

在活動前，先吃包。食包，食飽，食包飽。請各位郊遊小朋友，在郊外野吃的小朋友，小心突如其來的大狗，牠們會失驚無神將你手中食物，走。

話說，如上圖她們在吃東西時，突然某山友帶著兩隻巨犬散步（高過蛋屋，便可歸入巨犬之列）(M注:是兩隻金毛尋回犬, 所以無論對比誰都是巨犬!)，兩巨犬已走過來涼亭，山友某已高聲大叫：唔駛驚，唔咬人，唔駛驚，佢好乖。

B&M已駕開，小心巨犬食了兩隻寶的頭顱，可惜頭顱雖保，但是其中一隻巨犬，出其不意的將屋妹手中的 "芝士餐肉三文治" 走。

B都儍了，竟然對住隻巨犬說：有冇搞錯。

至於屋妹，好鎮定，若無其事。其實是已嚇到呆咗了。驚驚，要即刻飲奶奶，再食三文治定驚。

而山友某則說，唔駛驚，狗洩洩，你過嚟打佢。

巨犬都左舊三文治，仲會過去搞佢咩。

嚇完，食飽後。玩吹波波。唔係，係玩倒波波水。倒晒，用嚟裝石仔。周圍走，搞吓啲草，花，執吓石仔。就係咁。得閒又食吓，飲吓。

蛋黃吃飽後，坐在大樹下，好俾心機咁寫生。佢係低著頭，什麼都唔睇咁畫，畫完，去玩執石仔。咁樣同係屋企畫，好似冇分別，都唔似寫生。可能係用個心感應吓，大自然給她無限靈感，用個心眼去睇，用隻手去畫。

CBO

近日，不知為什麼，蛋黃的情緒有點失控。搞到B都跟著蛋黃走，變成CBO（CRAZY BABA :o）。

當蛋黃遇著不如意，不稱心，便說：
我唔同你做好朋友
我唔鐘意你
我唔理你
你走開啊
NO
哇！哇！

例子一：
在街玩彈波波，彈中五或四連珠，會有奬品。中了一定開心。差少少，即刻大喊，要再玩多次。（唔俾）喊，開始重覆上述用語。

例子二：
B:明天接你放學喎
蛋：好野，買野送俾蛋．．．．
B：唔可以成日買野．．．
蛋：瞓覺．．．．．喊．．．．唔同你瞓．．．你走啊．．．．．．我唔鐘意你．．．．
如是者，喊喊喊，越來越大聲。

聽蛋黃的校長說，小朋友在學校太乖，壓抑太大，在家的表現會差20%，這是小朋友常態。但是蛋黃的症狀，似乎係馬上變成 "超級無敵限量終極撒亞人"，沒有任何保留餘地，佢威力，足以搞到屋妹呆左，跟住想打佢（見到屋妹，個樣皺晒眉頭，應該係一個煩樣。）係一種反常200%的樣子。

同一時間，如果父母，即係M&B在這樣情況下，情緒上亦變成超級撒亞人，場面都幾難收拾。不過B依然受到感染，變左身。幸甚，還有M 即刻變成剪刀，將這個 "超級無敵限量終極撒亞人" 的尾巴剪掉，讓她回復正常。

照顧孩子如同角力，如何以柔制剛。真係你估電影特技，話咁易。電影特技的後期製作都要幾個月時間，同孩子玩特技（特殊抑壓技）真的要不斷學習。

阿門！

我要對女仔說 yes ! yes! yes!

話說，M&B一直積極地讓蛋黃一個人睡。

然後再鍛練屋妹睡，咁就兩隻小魔怪一間房了。
可惜，B的閒吓閒吓苟且的心態，未能貫徹地執行最高的指示。依然與蛋黃一起甜蜜蜜。

直至近日，蛋黃嚴重且失控的鬧情緒，閒事一樁，便會哭過不停，繼而動手動腳，郁頭。初時，曾經懷疑保姆們是否給她吃了ｆｉｎｇ頭藥水。 如是者，B終於按奈不住，突然搬離住房，有見及此，M當然馬上斥令蛋黃乖乖睡在床上。

另一方面，也藉著這黃金機遇，入主蛋黃睡房，踢走那個懶懶B，積極地執行一人一床政策。

可憐的不僅是蛋黃，要自己一個人睡，更可憐的是B，斯人獨憔悴，獨守空房，孤伶伶一個人睡。蛋至少有M&M（Mui Mui，又名屋妹）伴碟。

不過，經過了兩天的特訓，蛋黃已漸入佳境，開始可以一個人睡了。

而M則乘時大叫：

對男仔說：NO! NO! NO!

我要對女仔說：YES! YES! YES!