皮膚滑滑

前晚，M與蛋吃飯時，

M：蛋你面面的皮膚真滑
蛋：係呀，我的面很滑
M：咁，仲有邊度滑呀?
蛋：手 啦、腳啦
M：咁，屁屁啲皮膚滑唔滑?
蛋：都好滑喎
M：嘩，咁你咪成身都好滑囉?
蛋：係嫁
M：咁，M啲皮膚滑唔滑呀?
蛋：唔滑喎
M：吓，唔滑呀? (扮可憐樣) 咁點樣啲皮膚先可以滑呀?
蛋馬上回答：痾屎
M：????? 吓，痾屎? 滑關痾屎咩事呀?
蛋：咁痾晒出嚟呢，就好囉，咪滑囉
M：.......(無語)

蛋回歸最原始的方法：排毒

吃

每晚的M&B開餐。蛋姐與屋妹都會興致勃勃地，急急腳拿著自己的碗具，匙與叉向著M&B的飯枱走過來，要餸。

誇張如屋妹，她會箭步的踏上梳化櫈，揭開食具盒，拿著自己的食具，啲啲答答的走過來，食食。

拿了一些（她心中的一碗滿的），然後說聲：該．．（即係唔該）
跟著便走去公主蓆，大大口的吃。好味的，或想吃的，又啲啲答答走過來，說：該．．．

拿了一些又吃過。

麗確

最近看了一本書，說跟孩子講道理，她們會明白的，而且會循著善的一面往前走。當然是爸媽本身的因子有著良好的基因。不過她們不是一部麗確打印機，按一吓START，馬上就會依著你的指示去做，你要不斷的重覆，無論任何時候，任何地點，都不斷循循善誘地，帶領她們走向正確而善良的一面，因為她們是一張雪白無暇的白紙，有著你的指引，必可達到。

先決條件，也是唯一條件：無比的耐性。

不過，爸媽還是要上先修班，耐性的培養。對著蛋黃與屋妹，真的是少一分耐性與勇氣，何以令她們走上正途。

蛋黃一開始便喊，要等到她喊完，才可講道理，因為有時她的喊聲比你的聲音更大。可能喊聲的作用是要掩蓋責罵之聲，或者讓自己變成受害者，有可能不會受罰（這只是推測）。當MB出口時候，蛋黃的喊聲亦隨之而調高。試問道理要往蛋黃那裏進。

然後會問蛋黃，咀咀用來做什麼，蛋黃說：說話，食野，唔好喊，唔乖．．．

屋妹頑劣個性，比蛋姐更甚，她會逃避，以笑避禍，怒吼以遮惡行。試難以觸摸。不過你跟她說道理時，問知道嗎？她會說：知道。跟住：唔住（即對唔住）。

不過兩位寶寶又會一下子，忘記了，繼續做她們想做的事，MB煩惱的事。

道理是要不斷地在她們徘徊，真的不能希望她們是一流性能的麗確

MB再問：以後會唔會再錯。屋妹老實地回答：會．．．．．．．．

一張相，兩個樣，一個好乖，相後的人竟然係度做壞事，搞破壞。跟她們講了多少次，孩子還是麗確一樣，繼續複製剛才”對唔住”的事出來。

依戀

屋妹愛媽媽。
特別是一早一夜，愛媽之情，難以言喻。愛的情度，不能以量度器計量，僅能用她的咀巴與手之黏力，作一引證。

早上會賴著床上，頭、手、咀三者並用依戀著媽。
晚上，依然是頭、手、咀並用佔據著媽。

這種近乎瘋戀之態，令人惻然。沒辦法，只有媽，她才能安心睡覺。又或者這是她頭、手、咀的戀狂症的早晚各一次發作。若依時滿足其慾，一切無事。還是她藉著依戀說深愛著媽。不管如何，屋妹受媽的責駡（當然是過于依戀），她仍愛著媽。頭、手、咀再次蠢蠢欲動．．．．．

聖誕樹

昨日冒著大風吹，蛋與屋買聖樹，配圓波，找星星，挑亮燈，選閃帶。

回家後，蛋姐掛圓波，綑閃帶，放公仔，配星星，M繫大波，B亮燈。屋在笑。

聖誕樹搞掂。不過，在寒夜中，聽到蛋黃鼻鼻"索索"聲。

下午，大風吹，感冒了。

希望一點事，不要假期困屋中。

學校的好孩子

學校的星期五是家長與老師的面談好時機，讓家長與老師交談了解小朋友在學的情形。

經老師告知，得悉蛋黃的理解也日見進步，只聽老師的指導一兩次，便明白了。不要擔心，蛋黃仍然是一個細BB。

咁就問，蛋黃有沒有情緒問題，老師馬上回答冇呀，好乖，當佢想要嘢時候，馬上會舉手示意。（當與M討論此事時，馬上想起中秋會，蛋黃答對問題，沒有禮物，馬上舉手示意，那種堅定而勇敢的態度，真係令人汗顏，使M&B為之變色。不過，蛋黃到了生死關頭時，也的確非常勇敢的喎！！好似上次playgroup中，忘記派糖，佢會自己問老師的。）

老師話：佢好聽老師話（指導）

B馬上搶答，係呀！老師叫佢唔好戴兩個髮夾回校，佢第二日馬上就話老師話一個就夠。
老師說：不過佢今日就戴太多了，佢話媽咪同佢戴
B馬上補充：唔係！佢今朝扭計，話要戴咋。

不過，老師心目中，她仍是一個好乖的孩子。

偏食冇煩惱

某天，蛋黃在上學途中。

她看著火車內的奶粉廣告（偏食冇煩惱的廣告）

“哥哥偏食唔緊要，飲奶粉。媽媽無煩惱。哥哥都乖 la”，這是廣告的意思（大概這個意思）

蛋黃看完：咁拽拽，唔食o野，都乖乖。

聞者一笑。

兩歲

昨晚回家, 保姆好高興地叫M問問屋妹幾多歲。

M：你叫咩名呀？
屋：屋妹（教了兩次就識講）
M：你幾多歲呀？
屋：兩歲（正確答案21個月）

M十分高興, 屋見M高興得手舞足蹈, 又好開心, 知道自己叻叻。

直擊報道

上星期六，蛋與M&B去培記面試。時間是下午2:00，即蛋的午睡時間……弊!
一大早，屋、蛋、M&B跟保姆一行五人，浩浩蕩蕩去Dr. Vincent處睇醫生。然後，屋跟保姆先回家，其餘三人吃午飯去。

M前一晚問過蛋想吃什麼
蛋：食大力粉
M：…….
蛋：食大力粉呀
M：咩係大力粉呀
蛋：咁，唔食大力粉，食通粉啦
M：哦，意大利粉呀，好啦，食意大利粉啦

面試前一個鐘，B拍拍蛋瞓覺，以免蛋面試時發飈。
面試前25分鐘，M拍醒蛋，並出動唇膏引誘，但不為所動！最後，唔記得B用什麼方法成功叫醒蛋。

面試是Group interview，只可一名家長陪上課室，並只可以小朋友自己入面試室。為免蛋見B在旁扭計，所以由M帶領。

入到課室，無什麼玩具，一大枱先得兩小盤玩具，又唔好玩，又有小朋友及家長霸去成盤絕無僅有的玩具。M&蛋無事做之際，老師已開始點名。其實是點編號，好似囚犯叫號碼。蛋玩都未玩過，便手拿著自己的准面試證排隊。一隊約6－7名小朋友到隔離課室面試。

面試過程7分鐘，空氣極汚糟，因為有地盤。小童軍請各家長可以排隊接寶寶。M一向是輸人唔輸陣，一個箭步排第一，讓蛋可以馬上見到M。最後，蛋笑著開心攞貼紙出來。

我在面試官視線範圍以外，馬上問蛋。
M：老師問你咩呀？
蛋：蛋黃
M：老師問你個名呀，仲問啲咩呀？
蛋：我答「我唔識答」
M：……咁，老師問咩唔識答呀，我教你吖
蛋：唔知喎
M：咁你响入面做咩呀？
蛋：玩煮飯仔，飲茶
M&B得出結論是蛋黃只顧玩煮飯仔，老豆姓乜都唔知，根本無聽到老師問乜，所以答唔識。

M：咁你攞貼紙時有無講多謝呀？
蛋：有！

唉！都好啦。二千幾人收二百四十個，仲難考過大學，無法啦。唉！

踏青

很久沒有與二寶出外，不計算一齊看病時候。


今天天氣不錯。不如一家四口，前往沙田公園再踏草地。


屋妹很興奮，很肚餓，脫了襪子，光著腳指，在草地到處跑。


蛋黃到了草地後，馬上除鞋，在草地到處跑。蚊子愛她，恐防受蚊癢之苦，不讓她脫襪子，隔了一層，享受草地之樂。

醜人多作怪

屋妹經常模仿蛋姐, 有點東施效顰。不過, 這個小東施又真係幾可愛。

蛋姐笑

學蛋姐笑。喂喂, 差好遠喎屋妹......

將M的珠鍊戴在頭上
學蛋姐整V字手勢, 不過, 點解係五隻手指0既?????

不打架時又真是相親相愛的

回憶錄(一)

回想第一次幫蛋拍學生證件相, 真是相當辛苦。到照相館拍, 蛋太過緊張, 木口木面, 唔靚, 自己拍, 又好辛苦, 拍了幾十張至得一張okay, 屋妹又响旁邊整蠱整怪。真係幫自己拍證件相都無咁辛苦。

成功作品!!

我們都係人哋阿爸

今日去睇醫生前，在老麥進早點時，巧遇二子之父母。
當然又係兩寶太過精靈，竟然問係唔係孖。

唔係．．．一個大隻啲，一個細咗小小囉

講講，自然講到學校。成績，到咗成績呢部份，竟然父親與母親的意見不一。前者秉承教育署的樣板廣告：求學不是求分數，八十分已很好，七十多分都能夠接受。

母親們如遇著洪水猛獸，有冇搞錯，咁樣唔得喎，依家唔谷等幾時，升中試，就是要由小谷到大，如果唔係點同人爭。吓！求學啫，唔駛咁搏掛。
母親們當然極力反對，各個家長，大圍的氣氛就是如此，否則自己的孩子就唔夠實力同人比拼。所以考試九十先僅僅合格，一百分才可以。

什麼世代，大雄的”ｏ”年代，好像已經過去了．．．

足三

今日是蛋黃的足三
可惜，與她的足二的狀況相同，病倒了。而且今年仲去探望醫生呢！
不過，B好努力的為蛋黃在不同場境中營造生日氣氛。

B：有什麼要戒口？酸．． ．
醫生：凍嘢、汽水、生冷嘢．．．

B想：佢係一個中國式西醫，當年B問醫生有什麼唔食得，醫生說：毒藥

B馬上說：蛋糕呢．．．（B見到醫生瞳孔放大）今日係佢生日．． ．
醫生：冇問題，等姑娘俾多一粒糖佢ｌａ

當然下午後，馬上買了小蛋糕給她，半磅啫，真係好細。始終都係病，都係少吃為妙呢。不過出事了，唔夠分，沒有給女麻女麻添（等有機會再給女麻女麻，女麻女麻剛上來，可憐地冇蛋糕吃）

蛋黃今日精靈依舊，去睇醫生，生龍活虎周圍走，現有92cm高，29磅重，眼仔碌碌。
祝佢身體健康，萬事如意

父母真偉大,我們還需學習

B在出差中，認識一個在外地工作地已逾十二年了，因為幾歲女兒在彼邦患上皮膚，痕至徹夜難眠，任何藥物都沒有反應了。偶爾回寶島探外公外婆兩個星期，就係咁冇事。

百思不得其解，於是決定放棄美國的一切回到這個深山中，重新開始，慢慢開始新的生活，工作也要重頭開始。

正如他說，人到這時候，工作為了什麼，為家庭，為孩子，他就為了孩子到了一個新的陌生環境，重新開始他的生活。

試問我們又如何，會為孩子放棄什麼，為她們的將來想想。
活在這一刻，我們還有什麼可為孩子想。

可憐的屋

話說B出差, 要三夜二日。B是蛋的至愛, 一發現大門有任何風吹草動, 蛋便馬上問：爸爸返嚟啦。

可憐！

但最最可憐的, 莫過於屋。因為自B出差後, 蛋的情況每況日下, 咳到嘔, 已嘔了兩晚, 並發高燒。如此, M當然不放心, 蛋亦不容許將她交由保姆陪睡。因此, 屋在被牽連的情況下, 跟保姆睡了兩天了。

據保姆反映, 第一天凌晨時份（一般是五點多）, 屋突然半夢半醒想掀保姆件衫。

然後細細聲：奶奶呀。
保姆：Autie Lyn 嚟嫁。

屋很失望, 轉身背向保姆, 然後飲泣。真可憐！

第二天晚上, 因為又不是M, 睡前哭了良久, 累了才睡。

M則兩天沒睡好, 因為蛋不斷發燒, 又咳到嘔, 要撤夜照顧。

第一夜半夜, 蛋因為很辛苦, 半夜半醒喊著要抱抱。M便一個箭步跑過去抱著她。誰不知質感有異, 不是平常的B。張開眼仔看看, 咦, 點解變咗M的? 於是一手撇開M：你走呀, 我唔要你呀, 我要爸爸呀（嗚嗚嗚......）好掛住爸爸呀。如此, 又再昏睡了。

可憐的蛋

月是故鄉明
八月十五永遠是家裏的最圓

b身在外地，特別想著在家裏病病的孖寶。更可憐的是蛋黃病了很久，上星期本有起色，今個星期三買蛋糕與同學慶祝，誰不知是一個完美的香蕉射球，撞柱彈出。

蛋黃上星期六病了，星期天b上機前，發燒，更可憐。今天仍然有燒，看來星期三學校生日派對要泡湯了。這真是她的命，連續兩年都病了，沒有慶祝生日，不過，這不重要，B誓要日日都是蛋黃的生日，日日健康。

屋妹則咳咳未了完，不過頑皮依舊（這是M說），希望她早日康復。

sell for feeling

孩子病了，要看醫生吃藥，如果增強孩子抵強力，便會強壯得多，跟藥物講再見。
這幾天蛋黃咳多了，聽到咳中痰，唉！下星期三學校將為她舉行生日會，MB異常雀躍，為她四出找尋可食用的蛋糕，可惜現在病了，真有點擔心，歷史重演，沒有生日蛋糕的生日。

言歸正傳，待醫生看後（一個很有名的兒科醫生，不過有人話佢好串，見仁見智），B便問醫生：平日吃肝油丸，吻魚肝油丸會否好一些。
醫：如果在埃塞俄比亞的小朋友食，就有啲用，香港小朋友就唔駛了
以澳洲做的調查，是最有力的證據。
找了一百對孖生小朋友做測試，一個有食吻魚肝油之類的東西，一個冇食。
找孖生的原因是他們的生活，飲食習慣是非常近似的。一年之後，兩者的差異不大。
醫：吃的都冇什作用，只是sell for feeling。
B：哦（心想：好彩冇買，不過醫生講的又係見仁見智）。

不過，蛋黃仍然病了，希望佢早日康復，可以參加星期三的派對。

屋妹面試記

星期六, M&B帶著屋妹去沙田面試。因為只帶屋沒帶蛋, 屋妹得戚得很。

因為是N1的面試, 大家都是小小B, 只是玩遊戲, 間中有老師問問題, 然後, 評分, 是group interview。

話說屋在校長說話時, 已不甘示弱, 跑了出去站在校長旁邊。玩遊戲時, 又不甘寂寞, 玩完一張又一張。其中, 有一男BB想搶她手中的有聲玩具。屋抓得很緊, 死也不放, 然後, 男BB無奈放棄, 屋也很有風度給他一架車車。誰不知, 辛苦保護的玩具, 被旁邊的英俊爸爸騙去了。

「阿女, 靚仔信唔過呀!」

最最可恨的, 是屋居然不肯說話。屋是說話的奇才, 連健康院的姑娘都不相信她語言發展的速度。但面試當天, 她居然一言不發, 恨得M差點想捏死她。

如此, 面試完結, 應該是失敗收場吧。無關係, 反正這間學校就算錄取, 我們也不會給屋念的。我們只是貪圖他們group interview, 為她兩年後的心儀學校做準備。如果到時是這樣子就死定了。

題外話, 蛋下星期六面試, 是心儀學校, 我們為她祈禱吧!

沒有喊打喊殺的星期日

話說瑪利姐姐剛從菲國來了數天, 雖然工作不很快手, 但十分勤勞, 也愛跟小孩玩耍, 所以, PASS !
這個星期日是首次有保姆幫忙的假日。一早M&B跟蛋去小瀝源聽主日學, 然後生日會, 然後到七田買雞雞, 又去超級城市買來佬薯仔, 煮蛋的最愛－－薯仔雞翼。

一切十分順利, 7:30 居然一家大細吃完晚飯, 有時間想做什麼好。真寫意。

以下是蛋畫給M&B的畫像。

這是M。
這是B。

妹妹的大玩偶

蛋姐愛哭，已是不容置疑的事實。
屋妹愛欺負家姐，也是無需再辯證的事實。

不過昨晚，歷史一次又一次地重演，此次B靜心欣賞這場得意劇。

當然是蛋黃又扭計了，可能屋妹見到這個情境太多次，開心覺得煩心了。
初時，氹下姐姐，要佢莫再哭，（哭多會傷心，又傷身）
誰不知，苦功下了，屋妹見未有反應，不過．．．．．．．．

好像折腳玩具狗一樣，摸一摸她，逗一逗她，竟然會有反應，汪汪，尾巴擺一擺。
於是屋妹開始玩一玩她的大玩偶，

點吓頭，摸吓腳，抓抓衣服
扯扯頭髮，篤吓面，拍拍脾
搔搔身，彎彎腰，笑一笑
一齊來去玩一玩

只見蛋黃好似小狗一樣，愈喊愈大聲。喊到停唔到。
原來玩具小狗，我們碰牠，牠在叫，不是代表牠開心，而是不滿。正如屋妹的大玩偶一樣。

惡霸妹

M:話說睡前, 蛋黃要聽貝兒故仔, 我就抱住飲緊奶奶豬0既屋妹去蛋黃床度講
M:點知, 屋妹心散 (其實又係因為無乜奶奶), 郁來郁去, 又想坐, 又想飲奶, 又話便
(轉另一便奶奶豬)
後來, 想坐响我同蛋黃中間
但好迫, 坐唔到, 其實蛋黃都有讓一讓佢坐開少少
M:屋妹佢坐唔到, 一巴打落家姐度
家姐無喊, 無打返佢, 但唔開心, 無出聲
我厲聲道: 做咩打家姐, 我叫咗你好多次唔准打家姐

然後打佢手仔
M: 佢居然學人喊
我繼續鬧到佢狗血淋頭
叫佢: 仲唔同家姐道歉
屋妹不敢迨慢, 馬上扁咀同家姐講: 唔住
仲主動撲過去錫返家姐
家姐都好, 原諒佢
M: 我就同家姐講: 蛋黃姐原諒屋妹啦, 屋妹唔識嘛
又同屋妹講: 唔准再打家姐吓
屋妹就答: 知

大家繼續聽貝兒故仔

M的遭遇

M&B的對話
M:話說蛋黃在火車中臨近到大埔時咬了M右手手腕一下
唔知咬親邊個穴位, 好痛, 隻手痺咗
M:我同蛋黃講, 好痛喎, 死0剌, 媽媽隻手唔郁得, 無感覺0剌
抱唔到你0剌
蛋黃好驚, 唔出聲, 原先咬完後是微微笑的, 後來唔出聲
到落車响月台, 佢突然唔行, 要抱抱
B:有冇
M:無, 好驚的樣子, 好似我跌咗罐桃一樣
M話: 媽媽隻手好痛, 抱唔到, 跛咗0剌

然後, 佢喊

M就話:好啦好啦, 抱你0剌, 哎吔, 好痛呀, 無感覺呀, 跛咗0剌
蛋黃喊得好可憐, 好驚, 以為真係跛咗, 頭仔响我膊頭度喊, 唔敢喊大聲
M問蛋黃: 媽媽隻手如果真係跛 咗唔郁得, 你會唔會照顧我, 餵我食飯呀?

蛋黃話會

M:出閘前, 真係好痛, 所以同佢講, 真係好痛, 自己行啦
M:蛋黃自己行
M:响火車度, 我話隻手有事時, 佢馬上錫返我, 但仲係跛咗

之後, 返屋企, 玩完一輪, 我舊事重提, 佢叫我自己搽膏膏.
M:依家仲痺緊

二十個月的屋

她笑過

笑到咀仔合唔埋,用手仔遮住

被人罰過,面壁思過

也乖過,靜靜地過

今天(27日)生日了,吹蠟蠋

吃蛋糕

惡奶奶與可憐家嫂

蛋黃凡事都愛哭，不管是M&B的斥責，還是扭計，又或是屋妹搶走她的心愛物。她都喜歡利用眼淚表達自己不滿

嗚，嗚，妹妹坐在我張櫈

哇，哇，妹妹攞咗我o的o野

哇哇，哇哇，妹妹打我

有時候，屋妹會打多蛋黃幾o野
跟住，屋妹會好得戚，M&B鬧佢時，佢會馬上走。有時會見到咪咪笑。

屋妹搶人野，勒令俾番蛋黃姐時，佢初時唔願意，大叫！跟著強搶回來，佢會大喊！！！

不過看到她倆，一個打著大肚兜，惡死騰騰，一個眼仔水汪汪，什麼都唔識做，剩係識得喊。
就好似o的惡奶奶與可憐兮兮的家嫂咁，真係無語。

陳老師

陳老師說：蛋黃，很乖，好有記性。

有一次，中午小睡之後，佢個髮夾甩咗，要帶番。但小朋友們起床，比較忙。

陳老師就話：不如等一陣茶點時幫你帶。

如是者，茶點過後。陳老師驚訝地話，蛋黃竟然說：老師，食完茶點，要帶番髮夾。

陳老師再話：蛋黃好有記性，而且仲記得o係芸芸的髮夾雲海之中，找回自己的夾。

所以陳老師非常之咁喜歡蛋黃，真係好乖．．．．．

M聽到後，心想，正常的事情，理據如下：
一、愛靚靚當然記得(B亦想，出街什麼事都可忘記，要搽唇膏，眼線，一定記得，今出門，更要搽了才可出發返學)
二、髮夾，梗係搵得翻，公主夾，有什麼公主玩意，可以逃得過佢雙法眼。

老師與學生一樣，都係容易氹的，皆因蛋黃實在太乖了．．．

兩座copying machines

學習是雙向的。
老師教學生，指引學生，獲得新知識。同時，老師可能在教導學生的過程中，不自覺地受到學生的影響，從學生處獲取了一些知識（父母亦是如此）。

蛋黃與屋妹，這兩位小朋友，便將這個互動交流的狀況，每天在重覆又重覆的上演著，互相抄襲對方。

不知為何，屋妹居然比姐姐先懂得如何打筋斗，姐姐見妹妹咁開心，學了 。
蛋黃唔開心，會變身為唐老鴨，嘟長個咀。近日，妹妹唔開心時，條咀仔會嘟得好長，面會拉得更長。

蛋黃有時發脾四時，會講：我嬲，我唔睬你 。
屋妹學會：嬲，嬲 （合埋兩隻眼仔作不滿狀）

蛋黃又係發脾四時，會打人，喊
屋妹又學會，打人

兩個都係一樣，唔知邊個學邊個，冇得去街，會喊。

兩條小小的鎖匙

兩條鎖匙碰在一起才發出響亮的聲音。

回到家，牆壁上，地板上給人塗鴉了。

蛋姐馬上指著牆壁說：妹妹畫。

於是問屋妹：係唔係你做。

屋妹馬上指著地下：呢．．吱．．姐．．．

互相指控只會越吵越烈，無助事件解決。小朋友相信（大人世界裏依然如是，或許這是天生的）視線轉移，便會將別人的注意力分散，自己闖的禍，便不用負責了。估唔到，細細個就懂得這個道理。怪不得，吵時鐘意大聲，可以令人分神。

奇怪的是這兩條小小的鎖匙，已懂得重覆又重覆的發出噹噹響。

上學一個月

已經同蛋返學，差不多接近一個月。
幸好蛋對長征式的回校上課，也已經適應能力。經過蛋與B多次的親身考察後，從坐二伯父的私家轎、坐大巴，到現在坐火車轉小巴。終於找出蛋B的路來了。

原來蛋是一個極速適應的人，馬上學校老師都稱讚她很好，自己懂得料理自己，聽話，上堂留心，懂得聽老師們的指引，上堂留心及勇於發問。
因此，有時她會有奬賞貼紙及糖

真係令MB們滿意了，亦感到安慰，老遠的走出鄉郊到半城市上學。但願她繼續努力。

PS.　聽聞保姆接她回家時，在巴士站上，見到帥哥，她留了口水，有啲嘢喎！！（待續）

澳門一日遊

同兩個小寶寶去澳門看利瑪竇展覽, 兩日一夜, 真係趕頭趕命。兩個寶似乎鍾意玩浴缸多過看展覽。

在船上扮阿拉女子

CEO ?

扮完CEO又扮0靚模

三個等吃的寶寶

屋妹開心地吃自助餐的糕糕, 蛋姐則忙著看隔離枱姐姐的鏡盒

回程了!!

我家有條西施骨

首先要大讚屋妹（或應該讚醫生手勢好?）, 昨天連打兩支防疫針都無喊, 離開時不忘講bye-bye。

妹妹自出世以來, 什麼都是normal的, 一切跟大圍原則辦事：學行時間、戒片時間、吃東西份量、出牙仔時間......

昨天, 打針前醫生幫她做例行檢查, 又係果句：標準。

引用醫生的原話：重多一磅就肥, 輕多一磅就瘦, 啱啱好。

咁屋妹即係西施骨乎?

紋身

好在ikea 姐姐知道這個MELODY公仔是什麼樣，否則都唔知畫什麼

屋妹企不定，影不好。B太笨，所以只影到手上糾結的花紋

em em dung

34個月與19個月的蛋糕

她們倆，一個34，一個19。

分別於兩日內共吃三個蛋糕。


一個34，兩日食著同一款蛋糕也不厭，佢係糕痴。

一個19，打破小孩子的定律，唔鐘意食朱古力蛋糕，佢係糕盲，真係你都估唔到。

黑超二人組

中秋賞"月"

中秋節，蛋黃學校搞了提燈會。

首次進入了蛋黃上課的班房。排排坐，食月餅。你一個時，我一個。

可能只有半個小時，玩一會，食一會，便走了。

蛋黃愛吃月餅。食得很和味。

猜燈謎，猜中了，老師忘記派禮物。

這晚，一家人由家中走到運頭塘，買了燈籠再走。屋妹很興奮選好，俾了錢的燈籠，竟然唔滿意，要換上另外一個。這一個行一步整個掉了出來，但仍是很開心。

追月，一家在家中，看吊扇下的月光。

四個人坐在地上，仰望天花板，吃著星星楊桃。

海灘暢泳

星期六，天晴晴，大家一早懷著到海灘之心情。

出發前，很興奮的

一切準備就緒，就在九龍火車站等著六姨、六姨友、四姨媽、四姨丈、表弟們的到來。
目的地為西貢銀線灣，想不到車程有半個多小時，表弟嘔吐了、蛋姐睡著了、屋妹口痕了。

到了海灘後，有忙著處理嘔吐物，急急換小小防水泳褲，有的繼續睡覺。
沒幾刻，攞好下海陣勢，蛋黃也醒了。在B以紙板圍起臨時更衣室後，蛋黃換上亮麗的泳衣，出海玩沙兼踏浪了。以下無需多講，睇相．．．．睇佢哋多暢快。

屋與M，一起看海的日子，屋穿上國王的泳衣

表姐與表弟，努力地堆沙，裝沙．．．

表哥努力地執石仔，表妹努力地倒表哥執的石仔出來

感覺是桃園結義場景。不過，表姐的反應慢了幾拍

　　　　漢堡包真的很好食，足三更和味。但是兩個足三，會不會太多呢！表弟的表情已經告了我們。但屋三卻好心急，快食我！！！

我要扮靚靚

我又要, 我又要

搽呢度, 呀...

好乖呢!!!

蛋爸

這是蛋心中的爸爸!!

驚慌一剎那

昨天, 又是M&B的Crazy Sunday night. 原先一切十分順利, 7:30居然吃好晚餐兼洗好碗。直至8:30, M幫屋妹刷好牙洗好面, 準備倒去潄口水及洗面水之際, 眼尾看見屋妹跟著蛋姐爬上M的床。因為屋妹的手仔腳仔不夠力, 只有頑皮攞滿分, 她肯定會跌下, 又因為旁邊有張櫈檔著雙腳, 所以, 百份之一百會頭仔先落地。M第一時間以脊椎作出反射, 用劉易斯跑一百米的速度, 加上跑回本壘的滑壘方式跣過去, 剛好單手截住屋妹。M奇怪何解B沒有看緊兩隻小魔怪, 以為他又看電視失了神, 但房內沒有他的影踪。

M大叫：爸爸呢！
（B施施然拉開廁所門, 伸個頭出嚟）
B：乜事呀？
M：屋妹差啲跌咗落床呀！
M見B只顧住自己疴屎, 真係火都嚟埋。

看見兩隻小魔怪還在嘻嘻笑, 唔識死, M罵了蛋姐一頓, 皆因是她首先爬上床, 然後屋妹模仿。蛋姐不知何解被罵得狗血淋頭, 望著B：點解鬧0既？

蛋姐已經大個女了, 要開始學習照顧妹妹, 做個負責任的蛋姐。

美麗有罪

阿蛋上了新的學校已有幾天了。

老師對她的超快適認新環境，都讚賞有嘉，而且仲點名讚賞，最開心的並不是阿蛋，可能是蛋媽。

可能阿蛋有點個人之處，我們還未真正的了解到，每分每秒看到的都是跳跳虎，有時真的有走漏眼的現象。

不過她班中的新”男”同學仔，就真的懂徥欣賞別人的長處。

今天老師放學很是凝重的跟蛋爸說

阿蛋今日俾同學仔熱情地捉住隻手，老師當然解釋到同學仔想同佢玩。可能這一個是阿蛋人生的第一個sexual shock，佢嚇到．．．不是尿尿，是喊！老師當然會說馬上安慰，並馬上告知同學仔，不要這樣，如想跟阿蛋玩，應該問准人家嘛。

有時呢家事情，忍得住，至出奇。因為．．．．．阿蛋．．．．

美麗．．．掛。所以，今次事件的兇手　是．．．

美麗有罪

屋妹也瘋狂

屋妹精靈非常, 知道很多事情, 包括：

1. 糖糖放在雪櫃內
2. 保姆是不會給她吃糖的
3. 只有M會給她吃糖

近日, 每當M下班回家, 屋妹都會急急腳拖住M入廚房要開雪櫃。

昨天, 又是這樣, 賴著要糖糖。蛋姐加入戰團。M見蛋姐昨天是 Good Girl, 乖乖喝苦茶, 所以奬她糖糖, 屋妹當然可以坐收漁人之利。

屋妹獲好立克糖一粒, 誰不知太興奮, 不小心掉在廚房地上。她當然想俯身拾起, 但M眼明手快, 快她一步丟入垃圾筒了。其間, 當然有向她解釋糖糖已糟糟, 不能吃云云。

屋妹的理解力是：糖糖被丟進垃圾筒 --> 沒有糖糖食

於是, 發飇變身成跳跳虎, 狂叫尖叫, 什麼都出齊。

最利害的是M, 居然沒有跟著發飇, 再給她一粒糖, 她就安靜了, 卻不知道自己錯 !!

B今天要疴屎

話說今天是B上課進修考試的大日子。

昨晚……

蛋：今日我同auntie Lyn瞓呀？
M：唔係呀, B聽日至返學丫嘛, 今晚同B瞓呀。
蛋：同B瞓, 睇公主呀？
M：唔睇啦, B聽日返學要考試呀, 要温書呀, 唔睇公主啦。
蛋：B要考試呀？
M：係呀。
蛋：點解B返學要疴屎0既？
M：（激動地）係考試唔係疴屎呀！

哭與笑

蛋黃與屋妹最大不同之處：哭與笑

蛋黃遇有一點問題：想要、不要、想喊的事情，馬上會大喊，有時會喊到收唔聲，不過透的淚線真的特別發達。無論在什麼時候、什麼地點，她都會喊。

屋妹做錯了事時，被人話，會馬上逃離現場，又或者，做其他事掩飾。不過最厲害就是笑。最近佢唔小心將碗飯（係成碗飯）整跌落地下。即刻笑笑，冇辦法，都唔知點教訓，算了。

蛋黃處理的手法，唔理三七二十一，即刻喊，越喊越大聲，有時自己都唔識收聲，或者會失控，跳來跳去，好似跳跳虎。

她的情緒教育還是要下工夫。人哋話情緒教育先由家庭開始，家庭先由父母開始，如果唔係見到佢成日喊，人都會顛，到時失控了，自己都會喊埋一份。有時仲會影響旁邊的小朋友呢！

不過都係笑瞇瞇過樣好啲，即使係做壞事，也好呢（指圖右的屋妹）

(M注：事緣M忙著幫蛋黃拍校服相, 就在大廳換上校服, 家居服就隨便丟在公主蓆上。正當M忙著幫蛋拍下數十個不同笑容的校服相時, 屋妹鬼鬼祟祟不知做什麼。原來, 她將蛋的家居服靜靜藏在書架內。M叫了她一聲問她做什麼, 她馬上回眸一笑, 想掩飾拽行。) :D

舞台劇

今天，有幸得七姨之邀請，多謝七姨！！！

一家四口樂也融融的浩浩蕩蕩的踩過港島區，直入演藝學院，嘻嘻哈哈看芝麻街。

蛋黃與屋妹看得不亦樂乎，兩位小朋友與在過百的小朋友們一起手舞足蹈地看著五顏六色的毛公仔在跳舞唱歌。
在剛入到表演場地，蛋黃不斷的問，Elmo呢！Big Bird呢！為什麼還不出來，
跟著，看不到他們，又問
Big Bird呢！去咗邊度．．．

看完之後，在回程途中，
我想同Cookie Monster握手，我想同Elmo握手．．．．．哇哇．．．哇哇．．．

另一邊廂，年紀小小的屋妹竟然比後排小男孩還勇敢，慶高采烈地欣賞，手仔郁郁，頭仔搖搖，跟著音樂起舞。不過，後排小男在關燈後，Telly在握手時呱呱大叫，事實又一次證明屋妹是一膽生毛的人。

兩位小朋友可能在上半場太過投入，竟然在下半場不到十五分鐘，竟然雙雙入睡，她們倆可能是全場唯二的小朋友在喧鬧的氣氛中入睡。

這晚，蛋黃睡前看著Elmo書，指著相片中的Elmo們，
我想喺喥（舞台）跳舞．．．．

入場前，先來張合照留念。（請找出十處不同）

同是三個人，相差幾十秒，表情各異，左面o個幅，準備好，一拍OK，不過屋妹唔知望邊，蛋黃在搞花，只有M最似一個被影相的人。右面o個幅，再拍，「蛋黃望著B呢！」跟著M&妹，一個眼望前，一個費事理你，望車車。最後一個，用表情complaint，咁樣得唔得。

後來才知道，要o殊o殊，原來係一個忍薯樣。

入場前，笑笑拍照留念。跟住見到人o地有米奇砌圖，嚷著要。然後說：我唔睇芝麻街。

都係o個句，快快入場，減少不必要的誘惑，不必要的情緒波動。

中場休息，喪玩，跟著開場，到佢o地兩個休息了。

說話

今晚回到家裏，蛋黃抱著玩具熊，說：
BB瞓覺，唔好嘈，o殊！！！

起身要食飯，跟著對B說：
你餵．．

然後用隻手（沒有間斷地），放在BB口中，原來他嘔，（咁似佢平日的飲食習慣），B說：
佢唔係大舊，肚仔唔舒服，要去急症室

如是者，去到醫院，醫生B說
回家食藥，多飲水，食粥．．．

回家後，B問蛋黃BB如何，要食什麼o野。蛋黃好緊張，好緊張，在想，在想，怕說錯話，好像要俾人罰罰，說話好細聲，像是沒有勇氣說話，不願意嘗試．．．

跟著便說：
食垃圾．．．

M&B忍住唔笑，B說：什麼o野
蛋黃便答：
食垃圾．．．食糖．．．．飲汁汁

跟住，B忍唔住：係唔係要食藥藥，食粥粥

再跟住，蛋黃便不停餵BB食藥，都唔俾佢食粥．．．

喪奔

屋妹快17個月了, 仍然行不穩, 背影有如鴨屁屁, 一扭一扭的。不過, 話雖如此, 近日喜歡上喪奔!

可能在家屈得太耐, 上星期天帶她及蛋姐到屋村商場走走, M本想拖著屋妹慢步, 誰不知, 屋妹爭脫M的手, 喪奔去了, 追得M差點缺氧暈倒。

回家後, 屋妹又想在家喪奔, 但M怕危險, 拖著她慢步。屋妹又想爭脫M的手, 這次M無論如何也不讓她得逞。屋妹終於放棄了, 乖乖地跟著M慢步。誰不知, 走了沒有10秒, 屋妹突如其來大力咬了M的手指。M痛得馬上鬆手（否則怕有斷手指筋之虞）, 屋妹又喪奔去了。

B說, 屋妹是等待時機, 君子報仇, 十年未晚的類型!!!!!!!!!!!!!

唱歌仔

近來蛋黃喜歡唱歌仔, 還喜歡自己填詞, 例如：

亞婆話我乖, 帶我去街街
行到公園去, 又帶我上中環
上中環又買中環, 上中環又買中環......

真利害, 可以買中環。

有時候, 歌詞相當驚嚇, 例如：

月光光, 照地堂
年卅晚, 摘檳榔
聽朝阿媽要趕走阿女麻.......

連婆媳關係也唱出來了, 反映家庭問題乎?
笑得B及保姆人仰馬翻。

無題

時間過得真快，轉眼已踏入炎夏。
咦！已經到了七月，暑假快來了。

一不小心，孩子失驚無神，大了很多。
蛋黃姐，就好像天氣，時陰，時晴，時雨，時冷，時熱。
總是難以捉摸。

不過最愛始終都係公主。

屋妹，已經進入反叛期了，懂走，懂笑，懂打人，懂大叫，懂學姐姐的壞事

夏日炎炎，想去沙灘

為應學校要求，因為今個星期開始，將會講到布布到海灘嬉水。因此老師要求蛋黃泳照一張。再過幾日，說要沙灘道具。

問題是蛋黃未去過海灘，如何辦呢？在房間拍泳衣照，M趕緊去文具店買了一些沙灘道具充撐下場面。

蛋黃長大了不少，懂得擺姿勢，最搞笑的是旁邊的屋妹，也跟著做。

蛋黃熱句

蛋黃熱句，會如其來，聽也聽唔切，反應都未俾時，已經過了。
但是，當熱句再次出現，再聽一吓，火都嚟埋，小朋友，點可以咁講．．．

當唔俾o野佢時，會講：我唔理你
當妹妹搶佢o野，或唔鐘意M&B鬧佢時，會講：我打你

當入夜時，攬著B時，會講：我好掛住你
當見到公主玩具（或任與公主有關）時，會講：好靚，公主（音調頗高）

當你同佢抹面時（唔小心大力咗啲），會講：唔好蝦我la
當扭計時，會講：抱抱

當M或B買了她的心頭好，會講：多謝，多謝媽媽、爸爸（次序會因應誰拿著東西給她時說的）
當要求食糖時，會講：一粒，一粒

她大了

她大個女了，她會對著你，眼瞇瞇，笑Me, Me。因為她很開心，咬著面包。

她又很有禮貌，咳的時候會雙手掩咀，不過會乘機手指塞落鼻孔，挖鼻泥。

她很盡責，很堅持，B叫她拿東西時，她一直堅持落去，你睇，手會由45度，慢慢變成75度，仍堅持手裏拿著，不過你俾手機佢時，會立即掉下，攞手機。

她大個女了，會跟蛋姐一起飲奶，睡在紅色格仔軟枕，很享受地飲著。不過也跟蛋姐一樣，飲淨少少，點都唔肯飲埋去。

她也會開始拿著工具吃東西，特別是能放入口的東西，好味呀！點都唔肯放手呢！！！

不過，點都好，她都是一個扭計精，唔俾o野佢時，佢會大叫，大喊。

她叫屋妹。