爭取

蛋黃上學已有一段時間，每次大病一場，老師們特別多說話跟她說。在入課室前，總是跟她好似小戀人談心一樣，笑咪咪在說話。

另外，她開始識得同人爭野。當然是大頭蝦的爭。話說前日臨放學時，急急腳番埋位，準備攞起書包，點知，覺得有啲重，原來隔離個同學女仔，一齊攞，當然你拉我，我拉你。奇怪的是蛋竟沒有大叫，不過睇佢個豬樣，都黎料，水汪汪的黑眼睛。點解會咁，梗係唔夠人爭。
大聲叫老師過來，老師已經忙到頭髮蓬鬆，髮夾變髮尾飾。當然一個箭步，看看書包的證件相，噢！！！這個唔係你喎，蛋黃，你睇吓，今日你的位置唔係之前坐嗰個喎，當然見到蛋黃尷尷尬，冇聲出，坐番底，攞番自己書包。

不過都厲害，佢都開始識得爭，爭取了。