續三面救世軍

其實, 我都唔知面試當日蛋黃攰啲乜, 一直都係我上戰場, 我都未話攰。

話說三面救世軍面試當日, 因為蛋黃找碴打擾M跟校長對話, 被M凶, 校長怕鬧出虐兒事件, 請B帶蛋黃外出玩玩。

M為免校長覺得蛋黃是頑皮不守規則的人, 馬上補鑊。



M: 唔知點解, 雖然只係差幾個月, 佢啲同學都可以坐定定聽老師講嘢。雖然老師講啲嘢好悶, 不過, 人哋小朋友就可以坐定定。

校長: 小朋友差幾個月係差好遠的, 佢11月底出世, 同其他小朋友年紀差好遠的, 佢係班度應該係好細0既B。(看表格) 你覺得佢剩係可以集中精神5分鐘而已嗎?

M: 係, 只有5分鐘。不過, 如果佢有興趣的事情, 佢會不斷重覆練習的。例如, 當年學習爬同行果時, 因為佢喜歡走動, 所以每天不停練習六七個小時, 所以, 佢10個半月已經識行了, 11個半月已經可以自己甩手行了。

校長: 嘩! 咁真係好早喎。

M: 係呀, 可能係以前細嗰果陣, 教佢乜佢都學得好快, 好似佢4個幾月已經開始識去廁所無賴過唔唔, 所以, 有啲嘢學得慢我就會好緊張, 好似講嘢就成日講唔好。

校長: 佢識自己去廁所0架?

M: 係, 會叫我哋話要去唔唔或0殊0殊。

校長: 好叻喎。我覺得佢講嘢可以 lu 喎, 又完全明白我講啲乜, 有啲細路同佢咁大一句說話都唔識講。(中間講咗大堆嘢, 省略) 你可以同佢講吓估仔書。好似啲有大公仔0既圖書。

M: 哎吔, 我仲同佢講白雪公主啲咁長0既書添。不過, 屋企都有大公仔0既書0架, 不過佢就係無耐性囉。講到一半, 佢就爭住指住啲公仔又要講埋一份, 搞到成日都講唔完一個故仔。

校長: 無緊要, 學習語言是雙方面的, 可以俾佢參與, 到再大個啲, 先教佢要有規矩, 要媽媽先講完你再講。依家佢咁細, 你講完佢都唔記得要講乜了。