彈波波

昨日開學前一天，準備就緒....
校服、書包、被、體溫咭，一切辦妥，唯獨頭髮未執。於是B趕開學前，理順吓蛋黃啲頭髮先。
預料之內，理髮店異常多人，多小朋友趁著最後時間，理髮開學。蛋黃很乖坐在一旁看電視，等B剪完頭髮，然後到她剪。

（下次要帶備圖書為她解悶，因為她真的很用心睇“洛神”，其中一幕，有人將甄宓推落水池。跟住蛋黃一直就問點解“公主”跌左落水池，王子救番佢。下次預備本書，可能有更好的體會呢，或者三國演義，又或者三國志）

理髮叔叔請她獨自一人坐，但佢係都要B抱，算la。過程尚算順利。

理髮後，蛋黃的重頭戲－－彈波波（四個波連成一線，橫又得，直又得，五個波就係大奬）。是否她指力有問題，還是她的幸運指數一直偏底。她與屋妹相比，還差一大截。她有時連玩五回，次次都係差一個才得勝，屋妹至多兩次搞掂，而且係五連波，可能佢手力差啲，但玩彈波的力度剛剛好。

昨天，如往常一樣，四次皆敗。離開，未到十步，唔得la，
忍唔住，喊la：我要貼紙，嗚嗚嗚．．．．
要雪糕嗎？
蛋斬釘截鐵地說：係
B：咁我買yogurt回家吃
蛋：我好肚餓，而家食…嗚嗚嗚……要貼紙
B：你輸左，無喎，唔緊要，下次再來……
蛋：嗚嗚嗚…要貼紙……
B：我哋預備彈波波啲錢用晒，下次la……冇晒錢la
嗚嗚嗚……爸爸賺錢……

OH, NO, B都無晒錢, 仲要即刻去賺錢, 玩彈波波……

這是什麼的小孩，不可以這樣的。為人父母者要用正式規勸，讓蛋黃冷靜，明白事理，問明原因。玩遊戲有輸有贏，下次再來。要學懂放手。

至於賺錢問題，太深奧，真的一時一刻未想到，也不知如何跟她解釋，待日後再說，或許找一些故事跟她說，也不錯。

最後B問，你玩彈波波係唔係為了貼紙？
蛋斬釘截鐵地說：係
B：不如下次老老實實買貼紙 la。

（不過，彈波波雖然係遊戲，或可訓練她們世界上沒有不勞而獲的事情。有時即使付出了，也不一定得到回報。然而，要相信希望在明天，不努力永遠也得不到美滿果實。）